انا اعترض

انا مع ميس رحمة صحيح اعتراضى قل بعد رد مصطفى لكن لسة ضدة

بص يا مصطفى انت معاك حق فى ان الاعلام منافق بس مش الكل فى ناس كانت مع الثورة ودول ليهم كل احترام لانهم من البداية قالو رائيهم بصراحة من قبل مايتنحى دة مش نفاق

اما الاعلام المصرى اللى كان مع الرئيس وقاعد يشتم فى شباب الثورة واول ماتنحى الرئيس بقى بيشتم فى الرئيس فدول المنافقين وانا اظن ان قصد على دول ومعاك حق

لكن بالنسبة لانة كان رمز ومينفعش يهينة فدة مينفعش يتقال على واحد زية

كفاية السرقة اللى سرقها هو واللى معاة فى نفس الوقت اللى ناس كتير كانو بيموتو بسبب الفقر

وناس بيبيعو اعضائهم عشان يقدرو يعيشو

شوف كام مليون مش قادرين يعيشو وبالرم من كدا فالسرقة دى اقل جريمة ارتكبها ضد الشعب المصرى

الغاز اللى بيتصدر لاسرائيل عشان يقتلو اخواتنا الفلسطينين واحنا عندنا لحد دلوقتى الغاز مدخلش يعنى يسيب شعبة محتاج ويبيع لاسرائيل عشان يقتلو اخواتنا

عبارة السلام كانت جاية من ايطاليا خردة المفروض انها خلاص تترمى واحنا اشترينا خمسة وعليناهم كمان واتنين منهم غرقو

واوراقها اللى تبين انها متنفعش لرحلة دولية خفوها ماهما عايزين يخلصو من الشعب شوف ناس اد اية ماتو فيها

الشباب اللى اتقتلو فى اثناء الثورة رغم انهم كانو رايحين يتظاهرو باحترام من غير اسلحة

الاف المعتقلين من غير ذنب وسينا اللى لسة اسرائيل فيها والاسم انها بقت بتاعتنا كلام على ورق

شوف كام جريمة عملها مبارك فى حقنا انا مستحيل اسامحة

انا بتمنالة العذاب فى الدنيا قبل الاخرة