منتديات كويك لووك
(نسخة قابلة للطباعة من الموضوع)
https://www.quicklook4u.com/vb/t259
أنقر هنا لمشاهدة الموضوع بهيئته الأصلية

النظام العشرى فى العد
Ahmed Adel 07-09-2008 05:27 مساءً
السلام عليكم ورحمة الله وبركاته ..


اولا كدة لو بتعمل اى حاجة اقفلها او سيبها دلوقتى .. او ارجع للموضوع ده بعدين لانه محتاج تركيز شوية ..


بتعرف تعد ..؟؟

ايه السؤال العبيط ده ..؟؟ اه طبعا بعرف اعد ..

1

2

3

4

5

6

7

8

9

10

11

12

وهكذا .. ايه الجديد يعنى ..

طيب مسالتش نفسك ف مرة اشمعنه بنعد لغاية 9 وبعد كدة بنحتاج خانتين عشان نكمل عد ..؟؟

اه .. ده اسمه النظام العشرى فى العد .. مش العشرى بتاع التكيف لا ده العشرى يعنى انك ممكن تمثل عشر أعداد فى خانة واحدة .. العشر أعداد دول هم 0 1 2 3 4 5 6 7 8 9 .. بعد كدة بنضطر نستخدم خانة تانية عشان نكمل العد ..

طيب يا ترى فى أنظمة تانية للعد ..؟؟

اه طبعا .. فى النظام الثمانى والنظام الثنائى والنظام السادس عشر بس مش هتكلم عنهم دلوقتى خالص .. خلونا نفهم النظام العشرى الأول ..

تعرف تقولى ايه الفرق بين الأرقام دى ..

7
77
707
7007
70007

؟؟

ايه اللى خلى 7007 اكبر من 707 على الرغم من ان الفرق بينهم صفر ..

وايه اللى يخلى 70 اكبر من 7 لكن 07 هى نفسها 7 ..؟؟

هقولك اهو حالا ..

فاكر زمااااااااااااان ايام ابتدائى كانوا بيقولوا لنا خانة الأحاد والعشرات والمئات ..؟؟

هو ده الى انا عايزه ..

اول خانة ع اليمين بنقول ان وزنها (واحد صحيح) .. وهقولك يعنى ايه وزنها حالا

الخانة التانية وزنها (عشرة أس واحد يعنى عشرة) ..

الخانة الثالثة وزنها (عشرة أس 2 يعنى 100)

الرابعة عشرة اس 3 يعنى الف ..

الخانة (ن) وزنها عشرة اس (ن-1) ..

ايه بقى الوزن ده ..

الوزن ده يعنى الرقم اللى محطوط ف الخانة دى معناه ايه ..

لما تحط 2 ف الخانة الى وزنها 1 يبقى معناها 2

لما تتحط ف الخانة اللى وزنها 10^1 يعنى 10 تبقى معناها 2*10=20

لما تتحط ف الخانة الى وزنها 10^2 يعنى 100 تبقى معناها 2*100 = 200

عشان كدة لو عاوز تكتب مئتين بتحط 2 ف الخانة اللى وزنها مية .. طيب والخانة اللى وزنها عشرة .؟؟ تعمل فيها ايه .. تحط فيها صفر .. والخانة اللى وزنها واحد تحط فيها صفر برضو ..

اذا انت شايف الكلام ده هايف طيب تعالى يا حلو ورينى نفسك لما اشرح لك النظام الثنائى .. :D :D :D

انتهى الدرس .. اتنمى انه يكون سهل وواضح عشان المرة الجاية ان شاء الله هشرح ازاى تحول اى رقم الى اصفار ووحايد .. يعنى ندخل عالم الكمبيوتر ..

الموضوع ايضا من تاليفى وليس منقولا ..

سلام

منتديات كويك لووك

Copyright © 2009-2024 PBBoard® Solutions. All Rights Reserved