هل أثر عليك انقطاع النت؟
...فوجدت ان ايقونة النت تشير الى ان الخدمة محدودة(limited connectivity) و لم اتوقع ابدا ان المشكله عويصة او صعبه و لكني- كما عودني (الواد اللي جايب النت عندنا في العماره)-انه بيقطع النت لما مزاجه يقله قمت رايح مكلمه علطول زي كل مره..واد يا احمد قاطع النت ليه مش هتبطل بقى هوا انا هدفعلك 30 جنيه نت و 25 جنيه موبيلات عشان اتحايل عليك ترجعه لما تقطعه؟؟ قالي يا استاذي(محترم قوي معايا 
) النت مقطوع من الشركه و انا نفسي مش واصلي نت أصلا قلتله احلف كدا انا مش مصدقك انتوا عارفين بقا نظام الثقة المطلقة دي 
...المهم حلفلي كذا مره مصدقتوش برضه نزلت لسيبر تحتينا بعد صلاة الجمعه لقيت السيبر كله مليان بس كل الأجهزه بتتفرج على افلام سألت صاحب السيبر قالي و الله يا دكتور كلمنا الشركه و بيقولوا ان الكابل اتقطع في البحر في ايطاليا و ان النت الآن يغطي 20% من مصر و مش هيرجع قبل تلات أيام...قلتله الله يطمنك
رجعت البيت و الإحباط يملؤني لا أدري لماذا كنت محبطا بتلك الطريقه احسست اني افتقد شيئا مهما جدا ...مع ان الواد كان بيقطع عني كتيير بس زي متقولو كدا انا ساعتها كنت عارف ان النت مش هيرجع قريب
المهم كنت مش لاقي حاجه اعملها على الكمبيوتر خالص كنت مفتقد المنتدى و الناس اللي في المنتدى و اللي بحس اني لازم اديهم جزء من يوزمي ساعتها مكنتش عارف اعمل ايه؟؟؟؟
مكنتش عارف تشكيل ماتش الزمالك...و مكنتش عارف ادخل على مواقع الزمالك عشان اشمت معاهم في الأهلي الياباني
...مكنتش عارف احمل تحديث الانتي فيرس...مكنتش عارف اكلم بابا او خالي على النت...مكنتش عارف اكلم اصحابي على الشات زي كل يوم جمعه...مكنتش عارف اخش على الفيس بوك... مكنتش عارف احمل حلقة ناروتو الأخيره..مكنتش مكنتش.....مكنتش عارف اعمل اي حاجه...حسيت ان النت ده اهم حاجه فعلا كانت في حياتي ..حاجه مكنتش حاسه بقيمتها الكبيره دي ايام وجودهادي قصة قطع النت الكاملة اللي حصلت معايا و شعوري نحيتها.....اكيد صدعتكوا ووجعت دماغكوا :# ....
و لذلك انسوا اي حاجه انا قلتها...و اعتبروني كنت بهلوث
و قولولي انتوا النت مأثر معاكوا فعلا و سببلكوا اي مشكله لما اتقطع ولا لأ و كان ايه شعوركوا ساعتها؟...صدعوا دماغي زي منتوا عايزين.. مستني ردودكم و ارائكم اللي بتسعدني دايما...مرحبا مره اخرى منتداي الحبيب
