منتديات كويك لووك
(نسخة قابلة للطباعة من الموضوع)
https://www.quicklook4u.com/vb/t1579
أنقر هنا لمشاهدة الموضوع بهيئته الأصلية

ليه بنحب ؟!
عبدالرحمن الحصري 24-10-2008 01:11 صباحاً
ليه بنحب ؟؟!!

كتبها : عبدالرحمن الحصري

***


سألو كتير عن معني الحب
يعني اشمعني وليه بنحب ؟
ليه بنحتاجله وبنندهله ، واما يغيب يشتاقله القلب ؟؟

***

معني الحب انك تتألم
لو محبوبك يوم تعبان
تشعر بيه قبل ما يتكلم
تقضي الليل وياه سهران
تسمع وجعه ... تمسح دمعه
وتخليه اسعد انسان

واما ايديك تمسح دمعاته
تظهر بسمة خجولة عليه
ينسي جراحه ... ينسي آهاته
ينسي اتألم امتي وليه
يسرح فيك ويدوب في عينيك
يسمع همسك ويغنيه



يعني الحب ما بين قلبين ... شوق وسعادة حنان وحنين
دقة قلب بيعشق قلب .. .. نظرة عين تتحدي الصعب
جمعت بين قلبين حبيبين !!


***

سألو كتير عن معني الحب
يعني اشمعني وليه بنحب ؟
ليه بنحتاجله وبنندهله ، واما يغيب يشتاقله القلب ؟؟

***
معني الحب انك تتمني
تقضي سنينك ويا حبيبك
نفسك ان معاه تتهني
تقضي شبابك جنبه وشيبك
عاشق صوته وحتي سكوته
وبترجوه عمره ما يسيبك



واما حبيبك يسمع همسك
يحلف انه يعيش لعينيك

يبقي نهارك فجرك شمسك
وينور عتمة لياليك
يفضل جنبك ... يعشق قلبك
طول العمر ايديه في ايديك


يعني الحب مابين قلبين ... رحمة مودة وشوق لسنين
ايد بتطبطب وقت الأزمة .. ترسم وقت الحزن البسمة
وتطمن قلبين حبيبين

***
سألو كتير عن معني الحب
يعني اشمعني وليه بنحب ؟
ليه بنحتاجله وبنندهله ، واما يغيب يشتاقله القلب ؟؟

***
لو محبوبك مانتاش شايفه
دايما قلبه معاك موجود
تسمع منه همس شفايفه
تلقي مفيش لقلوبكو حدود
يعني الروح ساكنة في الروح
مهما الجسم يغيب ويعود


واما بيترجع يجري عليك
تنطق عينه بالاشواق
تلمح نظرة تحن اليك
تلمح فيها دموع مشتاق
قلبه اشتاقلك .. نفسه يقولك
آخر مرة نعيش في فراق


يعني الحب ما بين قلبين ... ضحكة وبسمة ودمعة عين
ضحكة بتعلي اما بيتلاقو ... دمعة تسيل لما بيشتاقو
ويفصل بينهم بعد وبين

***

منتديات كويك لووك

Copyright © 2009-2024 PBBoard® Solutions. All Rights Reserved