أحب أبدأ الموضوع بقصيدتتين أعجبونى
والأولى لمحمد الأباصيرى
سبنى ومشى مبارك .............. الشعب جابوا تانى بإيديه
هتقولى ازاى دا مرمى ف طره ... اومال شفيق دا بيعمل ايه
انضحك علينا ف محكمه .................. والعدل تاه بينا يا بيه
شعبنا دا شعب غلابه ............. وبأى كلام مضحوك عليه
ضحكوا علينا وقالوا ثوره ............. والنظام رجعين كدا ليه
قالولنا حق الشهدا هيرجع ...... يوم القيامه نتحاسب فيه
دم الشهيد بينا دا ضاع ............. والشعب للظلم انصاع
وقلب أمه دا حرقوه ................ قال بالفلوس هيطافوه!
والثانيه
رائعة احمدفؤاد نجم - سيادة المخلوع ... ارجعلنا
سيادة المخلوع ... ارجعلنا
... مش انت واحد مننا ؟؟
و عمرك في يوم ما سرقتنا
...ولا خدت مليم مننا
ما تيجي طب ترجعلنا
تقعد بأهلك وسطنا
أهو مرة تاكل أكلنا
وتلبس يا خويا من لبسنا
وتعيش في حارة او في شارع زينا
قلت ايه ؟؟ يا حارق دمنا
سيادة المخلوع ... ارجعلنا
وغداك يا سيدي عندي أنا
رز و بطاطس مسرطنة
لحمة ؟؟... مفيش من سنة
فاكهة ؟؟... تعيش انت و أنا
و الشاي .. بآخر معلقة م السكر اللي كان عندنا
اشرب و فوق وركز بقه .. علشان نكمل حكينا
سيادة الرئيس ... ارجعلنا
مش سبت الحكم .. لأجلنا ؟؟ـ
ما تيجي تسمع حكمنا !!ـ
أفكرك ؟؟ ولا انت فاكر زينا
قطار اتحرق من كام سنة
وغازنا اللي طار من أرضنا ... لعدونا
وعبارة مللي بيغرقوا ..!! غرقت في عرض البحر و راحوا أهلنا ... و الجاني فلسع مننا
ومركبة بأحلى شباب ... ييجوا من ايطاليا غرقانين .. والقرش ياكل لحمنا
والله كانوا زينا
ويمكن أحسن مننا
لهم بيوت و ولاد و عيشة و حلم .. زي حلمنا
اتغربوا و اتبهدلوا .. لما الفساد طال كل حاجة في أرضنا
واللي ما ماتش .. قاعد في غربته .. والغريب بيذلنا
اقول كمان ؟؟ ولا كفاية ... و اهو انت عارف عننا
أصبر هتسمع حكمنا
سيادة الرئيس ... ارجعلنا
ولو انت واحد مننا
فعلا يهمك أمرنا
بينا عالنائب العام .. تفتنله على ولاد الحرام ... مصوا بلدنا و دمنا
و افتن دي فتنة مش حرام .. ده حقنا
دا لو انت واحد مننا
أصبر هتسمع حكمنا
سيادة الرئيس ... ارجعلنا
اقعد معانا و زينا
هعرفك .....ـ
دي (أم خالد) أمنا
ودول أهل (سالي) أهلنا
و(عمر بن بنونة ) إبننا
فسر و احكي و قللهم .. و قللنا
واستسمح الروح اللي منورة في الجنة عند ربنا
هتقول مكنش قصدنا ؟؟ـ
دول ماتوا غصب عننا ؟؟ـ
كداب و فاجر .. و اللي يصدقك زيك .. والكدب ريحته منتنة
تتشل إيد اللي ضرب ،، و اللي أمر ،، و عليكوا لعنة ربنا
أصبر هتسمع حكما
أيوه بقول ارجع لنا
ياللي سرقت حلمنا
وغربتنا و نهبتنا ... و في كل حتة أهنتنا
إحنا اللي سال دمنا
في الأربعين و اسكندرية و التحرير يشهدلنا
آدي القفص ... أقف هنا
والشعب يحكم .. مش أنا
صدقني ... هي بينة
من فوق سبع سماوات .. قالها ربنا
العين بالعين والسن بالسن ... و هو دا بقه حكمنا ... و مفيش غيره عندنا ..
كان مجرد حلم بعد الثوره أن احنا نبقى شعب محترم ليه كيان نحمى ثورتنا نعيش حياه كريمه مفيش ظابط يوقفنى ويبهدلنى وأنا مش متهم ولا عملت حاجه مفيش اعتقالات سياسيه
كان نفسى أما أدخل أى مكان الخدمات تكون متوفره لكل مواطن عادى مفيش أى تفرقه بس للاسف كل مكان أدخله ألاقى فيه رشوه محستش بيوم بأى حياه كريمه محستش بكرامتى فى بلد باعت كرامه شعبها....... كرم الله مصر والمصريين فى القرأن الكريم ولكن نحن لم نكرم أنفسنا بتصرفاتنا وقيادتنا الهزيله يعاملنا الكثير بخارج وطننا على أننا عبيد...... كل مواطن حاطط هدف وهو أنه يخرج من مصر يبعد عن مصر.... كل حاجه نقول ده شعب هيفضل طول عمره كده شعب حابب الذل والمهانه
قامت الثوره علشان تحقق هدف من أهداف كل مواطن..... علشان تنشر الوعى فى نفوسنا ..... قناه السويس والغاز الطبيعى والذهب وحاجات كتير فى مصر فين حقى فيها؟!!!! كل حاجه كان يتقال أن مصر فقيره بس الحقيقه اللى وجدناها أنها غنيه بكل المقاييس ولكن لا توجد عداله اجتماعيه تماما قيادات تنهب فلوسنا وثرواتنا ومعيشيينا فى ذل وهوان ....... حكومه تبهدل فى الشعب والشعب يقتل فى بعضه ده اللى احنا شفناه
اذا أنا وانا فى بلدى ومش عارف أجيب حقى ومش لاقى كرامتى ايه اللى يخلينى أعيش فيها من أصله؟! واذا خرجت من بلدى هلاقى كرامتى ازاى وأنا مش لاقيها فى بلدى؟!
احنا فى بلد محدش بيجيب حقه فيها الا بالدراع للاسف وقضاء غريب ..... أمهات الشهداء أولادهم ماتوا ومش عارفيين يجيبوا حق ولادهم فى البلد اللى باعتنا دى
ضحكوا علينا وقالوا دى ثوره....ضحكوا علينا وقالوا ده استفتاء......ضحكوا علينا وقالوا دى انتخابات مجلس شعب.....ضحكوا علينا وقالوا دى انتخابات الرئاسه
وفى الاخر طلع ما يمثل انقلاب عسكرى ناعم وأنا كنت نايم....ده كان مجرد حلم عندى ....دى كانت مجرد فكره أنى أبقى مواطن مصرى ليه كرامه وليه حقوق
درست حقوق انسان وأنا حتى ملقتش ليه حق زى حقوق الحيوانات
اذا كانت انتخابات رئاسيه نزيهه وجاءت فعلا بشفيق فانه فعلا سيكون شعبا لا يستحق أى ثوره ولا يستحق أى حياه كريمه فمن الديمقراطيه أن أحترم رأى الاغلبيه طالما كانت نزيهه ...... حق الشهيد ضيعناها ومعرفناش نجيبه كل مجرم حقير متواطىء أمثال مبارك والعادلى مخدوش عقاب يذلهم ويهينهم ويحسسهم أنهم مجرد كلاب سلطه وكلاب العادلى أخدوا براءه وجمال وعلاء براءه
أما بقى الثوار اللى ماتوا حقهم مدفون فى ارض شعبها ذليل واذا احنا كنا شعب نذل مش يستحق أى كرامه فالشهداء ليهم أحسن كرامه وحقهم اذا احنا مجبنهوش فهم هيجيبوه يوم القيامه
بس أنا أو أى مواطن كان عنده حلم لم يعد أمامنا سوى خيارين أما أن نقوم بثوره جديده وأما ان نرضى بحياه الذل ونصبح كالعبيد
بعد كل جريمه قالوا المرتكب طرف ثالث وأنا مش عارف لحد دلوقتى بقالنا سنه ونص مش عارفيين مين هو الطرف الثال ده غير أنى بخاف منه ولما بيظهر بتضيع حقوق الناس
كان حلم جميل وهفضل أحلم
فى الاخر هقول
كما أن للبيت رب يحميه
فللبلد رب يحميها
لك الله يا مصر
ياريت كل واحد يقولى احساسه ايه دلوقتى بعد الثوره واللى حصل !!!