عودة الخطف السياسي: بدور وقصة اختطافها وتعذيبها

  • بدور: قيدوني وعصبوا عيني ومنعوا الماء عني وهددوني بالتعامل معي على طريقة الشرطة العسكرية

  • سألوني انت تبع أي حركه وبتنزلى ليه مع ألتراس أهلاوي و 6 ابريل والثورة مستمرة ؟

  • كهربوني باليكتريك في ظهري وسبوني.. ولما قلت لهم فيه رئيس منتخب هياخد حقي رد علي “ده حيا الله عروسة”

كتبت الناشطة بدرية محمود الشهيرة بـ “بدور” الناشطة بحركة حازمون شهادتها عن واقعة اختطافها من قبل مجهولين .. كانت بدرية قد اختطفت ليلة الرؤية لتثير كثير من التساؤلات حول من قام باختطافها .. خاصة أن اختفائها جاء عقب أداء صلاة التراويح في ميدان التحرير واستمر لمدة يومين .. وخلال مدة اختطافها  ثارت الكثير من التساؤلات حول من يقف وراء الحادث خاصة أن بدور كانت إحدى المشاركات في أحداث السفارة السورية وأصيبت بخراطيش في ساقها… فضلا عن كونها شاهدة النفي  الوحيدة في قضية المسعف أنس العسال أحد المعتقلين في قضية أحداث العباسية والذي كانت ستدلي بشهادتها في قضيته .

كتبت بدور شهادتها على وقائع اختطافها على حسابها بموقع التواصل الاجتماعي فيسبوك لتكشف ما حدث لها وكيف تم تقييدها وتعصيب عينها وربطها إلى كرسي وتهديدها بالتعامل معها على طريقة الشرطة العسكرية قبل أن يتم إطلاق سراحها.. ورصدت بدور وقائع استجوابها من أشخاص لم تتبينهم متهمة أمن الدولة بالوقوف وراء الحادث.

وتنقل البديل شهادة بدور خاصة أنها تأتي في سياق 3 وقائع خطف لناشطين سياسيين .. وإلى نص الشهادة  كما جاءت على حسابها على فيسبوك نصا ودون تدخل قالت:

أنا بدرية محمود ” بدور ” .. توضيحا للأمر ونظرا لكثرة الشائعات التي ظهرت اننى كنت في المستشفى أو اختطفت من قبل المخابرات السورية

 .. اللي حصل كالآتي

أنا كنت رايحه مستشفى عشان اطلع الخرطوش اللى فى رجلى وانا راجعه البيت الساعه كانت 10 لقيت تاكسى واقف على جنب وواحد بيطلب منى انى اساعد مراته فى النزول لانها مريضه ولما جيت اساعدها رشت عليا مخدر ولما فوقت لقيت نفسى قاعده على كرسى ورجلى متكتفه وايدى ورا ظهرى ومتكتفه ومغمين عينى , وقعدت حوالى 4 ساعات مكنش فى حد وبعد كدا لقيت حد بيكلمنى وبيسألنى

اسمك ؟

سنك ؟

عنوانك ؟

وكل اما اجاوب على سؤال يقولى انا عارف وبدأ يضربنى ويشتم بالفاظ خارجه ويقولى انتى ايه اللى بينزلك الميدان وايه اللى بيخليكى تشاركى فى مسيرات وقعد يشتم وقالى على تحركاتى الـ 3 ايام الماضيه كلها ويقولى احنا هنوريكوا اللى عمركوا ما شفتوه .

على العموم “محمد سعاده” جاى شويه كدا وبقيت الجروب بتاعكم عازمينهم على الفطار تالت يوم رمضان وللعلم محمد سعاده هو  مؤسس حركة صامدون وعرفت أول ما خرجت إنه كان هناك محاوله لاختطافه من قبل 5 اشخاص ولكنهم فشلوا

وبدأ يسألنى اسئله غريبه , انتى تبع مين بالظبط ومين اللى بيديكى اوامر وبتعمله ايه فى الميدان وبتجتمعوا وتتفقوا على ايه فى اجتماعات صفحة كان فين ابو اسماعيل قبل الثورة ؟

 وايه الاماكن اللى ناوين تعملوا فيها مسيرات الايام اللى جايه وبدأ يضربنى تانى وبدأ يكهربنى باليكتريك فى ظهرى وسبنى وقت طويل , بعد كدا رجع تانى وقعد يسالنى  انتى تبع انهى حركه وبتنزلى ليه مع اولتراس اهلاوى و 6 ابريل والثورة مستمره وحركة المعتقلين السياسيين؟؟

قولتلوا انا بنزل مع اللى مطالبه هيا مطالبى وانا مش تبع تنظيم انا تبع حركة حازمون قعد يضربنى تانى وقالى احنا هنعرفكوا ازاى تنزلوا الميدان

 طلبت منه انه يفك الحبل من ايدي وانا مش هتحرك رفض وقاللي لاء وقالى لو نزلتى فى اى حاجه بعد كدا هنسى ان انا امن دولة وهاعملك معاملة الشرطة العسكرية اكيد عارفه الشرطه العسكرية بتعمل ايه فى البنات.

قعد يحلف انه يقدر يلمنا كلنا لو فى سابع ارض بس كل حاجه بوقتها وقالى مش عايز اشوف وشك تانى ولما قولتلوا هتسبونى قالى ملكيش دعوه ومشى وبعد كدا حد تانى  فكلى ايدى,  قعدت اتكلم معاه مرضش عليا وقعدت اقوله ممكن اشرب مرضش وبعد شويه جه اللى كان بيكلمنى فى الاول وقالى عايزه تشربى قولتلوا ايوه

 قالى بس كدا من عنينا وسمعت صوت المياه وهيا بتدلىء على الارض قولتلوا ايه جو الافلام ده راح قالى انا هاوريكى جو الافلام بجد لو شوفتك فى اى مكان تانى ومش عايز اسمع عنك انك روحتى فى اى حته خاصه بالثورة

 قولتلوا احنا عندنا رئيس منتخب  ويقدر يجيب لى حقى قالى انتوا فاكرين مرسى ده رئيس ده حيا الله عروسة لعبه وبعد نقاش دار ما بينا سابنى وطلع

 وبعد وقت طويل جدا جه واحد تانى فك لى رجلى وقمنا مشينا طلعنا من الاوضه وفضلنا ماشيين وبعد كدا نزلنا سلم كبير وركبنا عربيه فضلت ماشية بينا اكتر من ساعه

 وانا فى العربيه واحد فى العربيه قالى مين هييجى ياخدك من المكان اللى هنزلك فيه قولتلوا انا هعرف اروح قالى ” عايزه رقم حد من صحابك اللى فى الميدان يجى ياخدك لو عايزه اى رقم انا معايا الارقام كلها قلت له عايزه رقم حسين امام.

 بعد 10 دقايق ادهولى فى ورقه ونزلونى فى حته انا معرفهاش وقالى انزلى قولتلوا واللى على عينى قالى احنا هانفكهالك وبعد ما نزلت من العربيه سمعت صوت العربيه مشيت حاولت افك الرباط اللى على عينى مكنتش عارفه وبعد كدا فكيته بالعافيه لقيت نفسى تحت كوبرى فضلت ماشيه مسافه كبيره لقيت كشك سالته احنا فين قالى احنا فى رمسيس جنب الجراج وبصيت لقيت محطة مصر بس انا مكنتش شايفه كويس بسبب الرباط اللى كان على عينى وطلعت ازازه مياه وقعدت اشرب من كتر العطش وبعد كدا سالته على موبايل وادهولى وكلمت حسين وجه خدنى واتصل ساعتها بمحمد دهبى وجالنا بالعربيه وجت ماما عند الكورنيش مصر القديمه .

 وروحت ومكنتش قادرة اتحرك من مكانى ومعرفتش انام نهائى على ظهرى والنهارده قدمت بلاغ تليغرافي للنائب العام وهعمل محضر بعد الفطار ان شاء الله بكل اللى حصل معايا وهكتب رقم المحضر للى عايز يعرفه وعايزه اقول فى الاخر حسبى الله ونعم الوكيل فى كل من قال عليا كلمه فى حقى وانا غايبه او طلع اشاعه من غير ما يتأكد منها عشان ناس كتير كانت هتضر بسبب الاشاعات اللى طلعت وبشكر كل اخواتى اللى وقفوا جانبى ومسبوش ماما الايام اللى فاتت واللى كانوا معايا بدعائهم ليا , وبرضوا يسقط يسقط حكم العسكر , ويسقط يسقط امن الدوله وامن الدولة كلاب الدولة.

المصدر: البديل

أضف تعليق

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

This website uses cookies to improve your experience. We'll assume you're ok with this, but you can opt-out if you wish. Accept Read More