إبتزاز واستغلال في امتحان القدرات 2012 بعلم معالي الوزير

والله احنا شعب غلبان ومكتوب عليه الشقا طول عمره , ومش ملاحق من الضغوط اللي عليه سواء في السياسة او المعيشة ولا ولا …… ولما مايلاقوش أي حاجة تشغله طبعا البطلة المرعبة بالوراثة “الثانوية العامة ومشاكلها” من مجاميع وتنسيق وخلافه ……..

المهم :::

ظهرت النتيجة 2012 واللي فرح فرح بس مش قوي يعني …. طب الطالب او الطالبة اللي جاب حاجة و90 أو 80 % يعمل إيه؟؟ طبيعي يدور علي فرصة معقولة … طب تنسيق المرحلة الأولي لسة ماظهرش بس لازم اللي يفكر في كلية زي سياحة وفنادق يبقي لازم اختبار قدرات !! قلنا ماشي مفيش مشاكل… رحنا نقدم وأول حاجة …لازم تجيب ظرف قيمته 25 جنيه مصحح طب ليه ؟ مش عارف مع ان مفيش فيه ورق يستاهل القيمة !! المهم جبنا الظرف وملينا الطلب وتوجهنا الي كلية سياحة وفنادق في عز الحر والصيام … وهناك الموظفة تقول لك مطلوب صور عادي وصورتين رقم الجلوس برده عادي لكن وبمنتهي البساطة تفاجأ بأنك لازم تدفع طوابع بقيمة 125 جنيه طب ليه ودي حاجة مش مضمونة خاصة التنسيق للمرحلة الولي لسة مظهرش … “هذا قرار من الوزير” هو ده كان رد الموظفة والمسئولين هناك .. وطبعا ولي الأمر لازم يدفع حتي لو مش مقتنع ..بس علشان ابنه او بنته ميحسش ان ولي امره بيبخل عليه!! طب دفعت استني بقي لما الدكاترة ييجوا بدون اي احترام لبني آدم جاي يختبر ومقبل علي مرحلة جامعية ..يعني استني في أي مكان شمس بقي ولا ظل في عز الصيام والحر … طب الدكاترة جم الساعة واحدة ظهرا ودخلوا غرف طبعا مكيفة وبدأوا الاختبارات المزعومة وكلو كوم واختبار المظهر كوم … يعني بعد ما الطالب او الطالبة اتشوي من الحر بدون حتي مروحة ..المفروض يدخل ومظهره حلو ومزاجه حلو وذهنه حاضر …. بقي دا اسمه كلام

وبعدين انت وحظك مع التنسيق ومدي اسيعاب بنشات (مدرجات) الكلية

اطمن انت لسة في مصر