المرشح المناسب…وليس المرشح المثالى

2

ad

مبدأيا كده لو انت شايف ان الثوار والمؤمنين باهداف الثورة والمتعاطفين معاها اغلبية فى البلد المنكوبة دى…يبقى شكرا جدا على محاولتك قراءة الكلام ده وممكن تتفضل تسيبك من باقى الكلام وتشوف حاجة اهم من كده….

….

اما اذا كنت مؤمن زيى ان الثوار والمؤمنين باهداف الثورة وحتى المتعاطفين معاها ((من غير ما يعملوا فعل ايجابى)) هم قلة و اقلية فى البلد دى يبقى كده تمام وحضرتك كمل قراية الكلام يمكن نوصل مع بعض لحل وسط….

….

طيب بعد المقدمة دى هل حضرتك تحب رجوع البلد او مش هاقول رجوع بقى هاقول استمرار البلد على ما كنت عليه و مازالت عليه؟؟؟!!

هل تحب استمرار الفساد…النهب…السرقة…الاهمال…عجز الرعاية الصحية….فشل التعليم….الوساطة….المحسوبية….توريث المناصب….غياب العدل….فساد الشرطة….سخرة المجندين فى الجيش….فساد القضاة و بالتالى ضياع الحقوق…حوادث الطرق…حوادث القطارات ….الشلل المرورى فى المدن المزدحمة…استمرار البلطجة والبلطجية….نمو العشوائيات…الاكل المسرطن….الامراض المتفشية…

طبعا فى سلبيات كتيرة جدا للاسف عقلى المتواضع مش قادر يجمعها كلها فى وقت واحد بس انت ايكد هتلاقى حاجات مش مكتوبة…

المهم لو عايز كل ده يستمر بكل بساطة هتسمح لاحمد شفيق او عمرو موسى بالفوز….!!!!

اه فعلا انت وانا و ثوريين كتير غيرنا هيقدموا الرئاسة لواحد منهم على طبق من دهب…..ازاى؟؟؟

اما نبقى احنا ثوار او متعاطفين مع الثورة واهدافها اقلية وفى نفس الوقت بدل ما كلنا نتوحد خلف مرشح شارك فى الثورة و مؤمن باهدافها فاحنا كل واحد منا هينتخب واحد غير تانى…..انا هانتخب ابوالفتوح….وانت حمدين صباحى….وصاحبى هينتخب خالد على…حاجة جميلة اوى..ديموقراطية صح؟؟ وهو ده اللى عايزينه صح؟؟ بس للاسف بقى كل 3 ثوريين اصواتهم هتروح قدام اتنين فلول..او اتنين كارهين الثورة و خلاص…او اتنين جهلة مش عارفين غير اسامى الناس اللى اتولت مناصب..!!! ارجع بقى للمقدمة بتاعتى فوق وافتكر ان الناس دى عددها اكتر مننا اصلا…!!!؟

ايه؟؟ الاخوان؟؟!!! لا مش ناسى ان الاخوان مندرجين تحت قايمة الثوار بس هما للاسف اصواتهم كلها لواحد رابع خالص…محمد مرسى…!!! يعنى زيادة فى التفتيت و الانشقاق….!!!؟

ولو انت مبسوط باداء الاخوان خلال المرحلة الانتقالية كلها خلاص رشح محمد مرسى بالمرة..!!! لو انت مبسوط بترشيح محمد مرسى اللى هو شخصيا مايعرفش مين اللى زقه على الموضوع ده خلاص انتخبه….!!؟

طيب نتفق على مين؟؟

ad

بردو بديهيا لو حضرتك عايز مرشح مثالى يبقى ما تروحش ترشح حد لان مفيش حد مثالى او نموذجى بالنسبة لاى انسان ..لازم تلاقى ليه غلطة او هفوة لانه انسان اولا واخيرا …

طيب السؤال تانى نتوحد حوالين مين؟؟

– سؤال: هل انت شايف خالد على اسمه معروف لرجل الشارع العادى….العادى ها؟؟ انا ماتكلمتش عن القرى والنجوع لسه؟؟ وماتكلمتش هما هيرشحوه او لا؟؟ انا بس عايز اعرف هما عارفين ان فى مرشح بالاسم ده اصلا؟؟

– سؤال: هل انت شايف ان اسم حمدين صباحى ممكن يكون مقبول عند البسطاء اللى بيتأثروا اوى بخطباء المساجد و شيوخ الدين..!!؟؟ هل انت شايف ان فى حالة اعادة حمدين مع مرسى مثلا ان الاخوان مش هيلجأوا للتأثير على الناخبين فى القرى والنجوع باسم الدين زى ما عملوا مع منافيسهم فى انتخابات البرلمان؟؟؟ هل انت واثق انه مش هتطلع اتهامات شيوعى…علمانى…ناصرى و هيضطهد المتدينين زى عبدالناصر و..و…و…و…!!!؟

– سؤال: مين المرشح اللى بيلقى قبول عند اكتر من فئة او تيار مصرى؟؟!! مين المرشح اللى فيه ليبرالى..يمينى متشدد…مسيحى…مسلم وسطى…يسارى…ثورى…حزب كنبة…كتلة صامتة ..مثقفين…عامة….بسطاء…فلاحين….عمال….بيدعموه؟؟!!!!؟

عبدالمنعم ابوالفتوح قد لا يكون مرشح مثالى للكثيرين…ولكنه مرشح مناسب….و هو فعلا المرشح الثورى من ضمن المرشحين الثوريين((حمدين صباحى-خالد على-سليم العوا-ابوالعزالحريرى)) اللى عنده فعلا فرصة كبيرة للاعادة و الفوز سواء مع احد الفلول او مرشح الاخوان…..!!!؟

ولكن تصويتك فى الجولة الاولى لاى مرشح اخر مع وعدك دعم ابوالفتوح او اى مرشح ثورى اذا ما وصل للاعادة فده بكل بساطة ممكن مايحصلش لانك بكل واقعية وده مبنى فعلا على اراء ناس كتير((طبيعية فى الشارع والشغل)) ممكن تلاقى وبنسبة كبيرة ان اللى بيعيد محمد مرسى امام شفيق او محمد مرسى امام عمرو موسى….و مش مستبعد والله

احمد شفيق امام عمرو موسى وساعتها دى هتبقى من المضحكات المبكيات…..!!؟

شايف كلامى ده غلط…متشائم…بحاول ادعم ابوالفتوح و خلاص…مش مقتنع صح؟؟ بتتكلم مع صحابك بتلاقى عدد كبير هيرشح حمدين؟؟ بتدخل على تويتر و بتلاقى ناس كتير هتنتخب خالد على..؟؟ حاسس ان ليهم شعبية عالية اوى….سورى الكلام ده كله فارغ…فقاعة تويتر والفيسبوك ما تزيدش عن الاف مع ملاحطة كمان ان مش كلهم ثوريين….صحابك دول نفس تفكيرك فطبيعى انك تلاقيهم زيك…لكن ما تعرفش الناس اللى فى بيئة مختلفة او تعليم مختلف بتفكر ازاى؟؟؟

وكل اللى هاقدر اقولهولك افتكر مهزلة الاستفتاء..ابوه بتاع 19 مارس…لما كل تويتر و كل الفيسبوك كانوا هيصوتوا ب لا…صحابك كلهم و صحابى كمان هيصوتوا ب لا..اهلك هيصوتوا ب لا.. اهى هيصوتوا ب لا.. متوقعين نتيجة ساحقة ل لا..صح…؟؟؟ والمفاجأة ان 4 مليون واحد بس صوتوا ب لا…واكتر من 20 مليون صوتوا ب نعم….!!؟

اخيرا انا احترم الاختلاف والديموقراطية اوى لكن لما يكون كل المرشحين محترمين او على الاقل الشعب وصل لمرحلة من النضج بعد فترة من ممارسة السياسة ومتابعتها…لكن دلوقتى الاختلاف ده هيبقى تشتت وتخلف وفعلا غباء سياسى…

لو انت فعلا مش عايز تبيع او تهدر دم الناس اللى ماتت…انتخب اللى ممكن ينجح..انتخب اللى ممكن ينجح ويجيب حقهم و ينتقم من قتلتهم و يكرم عائلاتهم…اه خالد على ناوى يعمل كده بس هل هو ممكن ينجح؟؟ اه حمدين صباحى ممكن يعمل كده بس هل هو ممكن ينجح؟؟

…..

انتخب المرشح المناسب……د/ عبدالمنعم ابوالفتوح..

Amr Elkholi

ad

ad

2 تعليقات
  1. Ferial Sadik يقول

    مصر الابية عزيزة قوية تسأل مين هيحكمنى مين

    مش مهم هيكون فتوح ولا صباحى ولا يسطاوسى او شفيق و لااسم مين او مين

    المهم ان اللى هيكمنى يعرف ان هيحكم شعب حر نزيه

    فيكون العدل ميزان حكمه ويجيب القصاص للشهداء اللى دمهم سال فى الميادين

    ويرفع همة بلده ويحافظ على اسمها فى كل مكان

    ده انا مصر اللى المولى ذكرنى فى القرآن

    مش عايزة واحد يكون همه هو السلطة والمنصب والجاه

    واذا كنتم مش عارفين شوفوا واتعلموا من قطز وبيبرس وصلاح الدين

  2. العاب فلاش يقول

    Hello my friend! I wish to say that this post is awesome, great written and include approximately all vital infos. I’d like to peer extra posts like this .

اترك رد

لن يتم نشر عنوان بريدك الإلكتروني.

This website uses cookies to improve your experience. We'll assume you're ok with this, but you can opt-out if you wish. AcceptRead More